Bu dünyada nə heç bir qul,
Nə də ki, bir şah qalacaq.
Bu dünyada bizdən ancaq,
Savabla, günah qalacaq.
Xəbərin olmaz özündən,
Doğulduq bir ol sözündən,
Asılıb göyün üzündən,
Neçə-neçə ah qalacaq.
Əzrayıl bizi güdəcək,
Nə vaxtsa əldə edəcək,
Gedəcək, hamı gedəcək,
Yaxşılıq vallah qalacaq.
Əvvəlin, sonun bilsək də,
Biz bu dünyaya gəlsək də,
Bir gün hamımız ölsək də,
Şükür ki, Allah qalacaq.
Yaxşılıq qalacaq
şeirin müəllifi: Roma Xosrov
Hər ömür
YanıtlaSilNə gəzirdim, nə tapmışam dünyada
Tapa bilməz itiyini hər ömür.
Hər ürəkdə arzu yüksək olsa da
Zirvə görməz gədiyini hər ömür
Bir ömür ki gündən-günə əksilə
Varlığını çalış sözə əks elə
Yaxşı-yaman baxar kökə, nəsilə
Əməl etməz dediyini hər ömür.
Yaxşı eylə yaxşılarla ülfəti
Yaxşı qoymaz yaxşılıqla minnəti
Yamanlığa silah edib nifrəti
Çəkə bilməz tətiyini hər ömür.
Hər taleyin toru balıq gətirməz
Ağac olub hər tum meyvə bitirməz
Hər bir insan sözdən ibrət götürməz
Tuta bilməz güdüyünü hər ömür.
Həyat verdi ibrətindən dərsimi
Lənətlərə düçar etdi tərsimi
Çərkəz; - ömür mizrab altda tar simi
Duya gərək kötüyünü hər ömür.
30/ xı – 1985
Gəlibdi
Payız ilin qocalığı
Ömrün zirvə ucalığı
Yol ayrıcı, haçalığı
Gözlərimə çən gəlibdi.
Saç-saqqalı bəyaz duman
Ümid keçib, sızlar güman
Baxışlardan kədər daman
Kirpiyimə nəm gəlibdi.
Bülbül qonmur budaqlara
Durna uçdu uzaqlara
Qırğın düşdü yarpaqlara
Yer üzünə qəm gəlibdi.
İstəyi var – yaz duyğusu
Hanı bənövşə qoxusu?
Əbədi torpaq yuxusu
Qəlbimə həmdəm gəlibdi.
10/ xıı – 1985